– haqıyqıy sanlardıń ($n$ ólshemli yamasa metrikalıq keńislik noqatlarınıń) fundamentallıq izbe-izligi. Bul ${{x}_{1}}, {{x}_{2}}, \ldots, {{x}_{n}}$ izbe-izligi bolıp, ol Koshi kriteriyine boysınadı, yaǵnıy hár qanday $\varepsilon >0$ sanı ushın sonday $N$ nomeri tabılıp, $N$ nen úlken hár qanday $n$ hám hár qanday $p>0$ ushın $|{{x}_{n+p}}-{{x}_{n}}|<\varepsilon$ teńsizlik orınlanadı (sáykes túrde $\rho ({{x}_{n+p}}, {{x}_{n}})<\varepsilon$ teńsizlik orınlanadı, bunda $\rho$ simvolı arqalı $n$ ólshemli yamasa metrikalıq keńisliktegi aralıq belgilengen). Izbe-izlik shekli limitke (sáykes túrde birden-bir limit noqatqa) iye bolıwı ushın ol fundamentallıq izbe-izlik bolıwı zárúrli hám jetkilikli (izbe-izliktiń jıynaqlıǵınıń Koshi kriteriyi). Eger metrikalıq keńisliktiń noqatlarınıń qálegen fundamentallıq izbe-izligi usı keńisliktiń bazıbir noqatına jıynaqlı bolsa, onda bul keńislik tolıq metrikalıq keńislik dep ataladı.