– funkciyanıń ósimi onıń argumentiniń ósimi arqalı bahalanatuǵın teńsizlik. $n$ ólshemli Evklid keńisliginiń $E$ oblastında anıqlanǵan $f(x)$ funkciyası $y\in E$ noqatta $\alpha$ kórsetkishli hám $A(y)$ koefficientli (bunda $0<\alpha<1$) Gyolder shártin qanaatlandıradı, eger $y$ ke jetkilikli jaqın barlıq $x\in E$ ushın $\left|f(x)-f(y)\right|\le A\left(y\right)\left|x-y\right|^{\alpha}$ teńsizligi orınlansa. Bir haqıyqıy ózgeriwshili sanlı funkciyalar ushın bunday shárt trigonometriyalıq qatarlar boyınsha izertlewlerge baylanıslı R. Lipshic tárepinen kirgizilgen edi (1864). Bul jaǵdayda Gyolder shártin $\alpha$ kórsetkishli $A$ turaqlıǵa iye Lipshic shárti dep ataǵan durıs boladı. $n$ $(n\ge 2)$ haqıyqıy ózgeriwshilerge iye sanlı funkciyalar ushın Gyolder shárti Nyutonlıq potencialdıń differenciallıq qásiyetlerin izertlewde O. Gyolder tárepinen eńgizilgen edi.