– ózgeriwshileri radikal belgisi astında yamasa bólshek dárejege kóteriw belgisi astında kelgen teńlemeler. Irracional teńlemelerdi sheshiwdiń eki usılın atap ótemiz: teńlemeniń eki jaǵın da birdey dárejege kóteriw usılı hám jańadan ózgeriwshiler kirgiziw usılı. Teńlemeniń eki jaǵın da birdey dárejege kóteriw usılın qollanǵanda tómendegiler isleniwi kerek: 1) berilgen irracional teńlemeni $\sqrt[n]{f\left( x \right)} = \sqrt[n]{g\left( x \right)}$ túrine keltirip túrlendiriledi; 2) kelip shıqqan teńlemeniń eki jaǵın da $n$-dárejege kóteredi: $\left(\sqrt[n]{f\left( x \right)}\right)^n = \left(\sqrt[n]{g\left( x \right)}\right)^n$; 3) $(\sqrt[n]{a})^n=a$ ekenin esapqa alıp, $f\left( x \right) = g\left( x \right)$ teńlemesi alınadı; 4) bul alınǵan teńlemeni sheshedi hám tekseriwdi orınlaydı, sebebi teńlemeniń eki jaǵın da birdey jup dárejege kóteriw jat korenlerdiń kelip shıǵıwına alıp keliwi múmkin. Bul tekseriw ózgeriwshiniń tabılǵan mánisin dáslepki teńlemege qoyıp tekseriw jolı menen ámelge asırıladı.