– úyreniw obyekti algebralıq sistemalar bolǵan matematikalıq ilim. Algebra termini Orta Aziyalı ullı matematik, jerlesimiz Muxammed al-Xorezmidiń 820-jılı jazılǵan “Xisob al-jabr val-Muqobala” kitabınıń atamasındaǵı ekinshi sózden, yaǵnıy “al-jabr” arab sózinen kelip shıqqan. Bul kitapta birinshi hám ekinshi dárejeli algebralıq teńlemelerdi sheshiwdiń ulıwmalıq usılları, sonday-aq, bunday teńlemege alıp kelinetuǵın ámeliy máseleler úyrenilgen. Dáslepki gezde algebra teńlemelerdi sheshiw haqqındaǵı táǵlimat sıpatında túsinilgen. Al, házirgi dáwirde algebra degende ıqtıyarlı tábiyatqa iye kóplikte ádettegi sanlardı qosıw hám kóbeytiw ámellerin hám sanlı qatnaslardı ulıwmalastırıwshı operaciyalar (ámeller) hám qatnaslardı úyrenetuǵın ilim túsiniledi.