– geometriyanıń anıqlanbaytuǵın tiykarǵı túsinikleriniń biri. Tegislik túsinigi menen birinshi márte tanısqanda, onı suwdıń, aynanıń yamasa stoldıń tegis beti menen salıstırıp, kóz aldına keltiriwge boladı. Geometriyanıń sistemalı kursında tegislik túsinigi tiykarǵı túsinik retinde qabıl etiledi. Tegisliktiń áhmiyetli qásiyetleri tómendegi aksiomalarda ańlatılǵan: 1) tegisliktiń eki noqatı arqalı ótiwshi tuwrı usı tegislikte jatadı. 2) bir tuwrıǵa tiyisli emes úsh noqat arqalı tek bir ǵana tegislik ótedi. Tegislik - birinshi tártipli algebralıq betlik: Dekart koordinatalar sistemasında birinshi dárejeli teńleme menen anıqlanadı. Hár qanday úsh belgisizli birinshi dárejeli $Ax+By+Cz+D=0$ teńlemesi tegislikti ańlatadı hám ol tegisliktiń ulıwma teńlemesi dep ataladı, bunda $A$, $B$, $C$, $D$ - turaqlılar, sonıń menen birge, $A$, $B$, $C$ barlıǵı bir waqıtta nolge teń emes sanlar.