– konustıń ultanına parallel túrde kesip ótiwshi tegislik penen ultanınıń arasındaǵı bólegi. Tuwrı dóńgelek konustan kelip shıqqan kesik konus tuwrı dóńgelek kesik konus dep ataladı. Tolıq konustıń ultanı kesik konustıń tómengi ultanı boladı. Kesiwshi tegisliktiń konus beti menen shegaralanǵan bólegi kesik konustıń joqarǵı ultanı dep ataladı. Ultanları arasındaǵı aralıq kesik konustıń biyikligi delinedi. Kesik konustıń kólemi $V=\dfrac{1}{3}h(q+Q+\sqrt{qQ})$ formulası menen anıqlanadı, bunda $q$, $Q$ - sáykes túrde kesik konustıń joqarǵı hám tómengi ultanlarınıń maydanları, al $h$ - biyikligi. Demek, $V=\dfrac{1}{3}\pi h(r^{2}+R^{2}+Rr)$ bunda $r$, $R$ - kesik konustıń, sáykes túrde, joqarǵı hám tómengi ultanlarınıń radiusları.