– ózgeriwshi (belgisiz) logarifm belgisi astında yamasa logarifmniń tiykarında bolatuǵın teńleme. Logarifmlik teńlemelerdi sheshkende hár qıylı usıllar qollanıladı. Berilgen logarifmlik teńlemeni durıs teńlikke aynaldıratuǵın belgisizdiń mánisi usı teńlemeniń koreni dep ataladı. Eń ápiwayı logarifmlik teńleme $\log_{a}x=b$ teńlemesi boladı, bunda $a>0$, $a\neq1$. Bul teńlemeniń koreni $x=a^b$ boladı. Logarifmlik teńlemelerdi sheshiw ushın tómendegi qaǵıyda paydalanıladı: $a>0$, $a\neq 1$ bolǵanda $\log_{a}f(x)=\log_{a}g(x)$ teńlemesiniń korenleri $f(x)>0$ (yamasa $g(x)>0$) shártin qanaatlandıratuǵın $f(x)=g(x)$ teńlemesiniń korenlerinen ibarat boladı. Logarifmlik teńlemelerdi sheshiwge hár qıylı usıllar paydalanıladı: potencirlew (qarań: POTENCIRLEW), jańa belgisizler (ózgeriwshiler) kirgiziw; logarifmlerdiń qásiyetlerinen (qarań: LOGARIFMLERDIŃ QÁSIYETLERI) paydalanıw, grafikalıq usıl hám teńlemelerdiń sheshiwdiń basqa juwıq sheshiw usılları.