– $0-a$ ayırması túrinde anıqlanatuǵın san (bul jerde $a$ - oń san), ol $-a$ túrinde belgilenedi. Oń sanlar kópligin teris sanlar menen tolıqtırǵanımızda, qosıw hám kóbeytiwdiń barlıq nızamlıqları hám teńsizliktiń kóplegen qásiyetleri saqlanadı. Bul tolıqtırılǵan kóplikte alıw ámeli barlıq waqıtta orınlanatuǵın boladı. Teris sanlar san kósherinde nol sanınıń sol jaǵında súwretlenedi. Teris sanlar eń áweli biziń eramızǵa deyingi III-ásirde-aq qıtaylıq matematiklerdiń jumıslarında ushrasadı. VI-XI-ásirlerde olardı xindistanlıq matematikler erkin paydalandı. Teris sanlar tek XVII-ásirde ǵana koordinatalar usılınıń payda bolıwı menen matematikaǵa turaqlı túrde kirdi.