– Meyli $ax^2+bx+c=0$, $a\neq 0$ kvadrat teńlemesi berilsin. $D=b^2-4ac$ ańlatpası kvadrat teńlemeniń diskriminantı dep ataladı. Tómendegi jaǵdaylar bolıwı múmkin: 1) Eger $D>0$ bolsa, onda kvadrat teńleme eki korenge iye: $$x_1=\displaystyle\frac{-b-\sqrt{D}}{2a}, \quad x_2=\displaystyle\frac{-b+\sqrt{D}}{2a}.$$ Qısqasha jazılıwı: $$x_{1,2}=\displaystyle\frac{-b\pm \sqrt{D}}{2a}.$$ Bul formula ulıwma túrdegi kvadrat teńlemeniń korenleriniń formulası dep ataladı. 2) Eger $D=0$ bolsa, onda $x_1=x_2=-\displaystyle\frac{b}{2a}$ - eki eseli haqıyqıy korenge iye. 3) Eger $D<0$ bolsa, onda teńlemeniń haqıyqıy korenleri joq, al bul jaǵdayda teńleme eki hár qıylı túyinles kompleks korenlerge iye. Eger ulıwma túrdegi kvadrat teńlemedegi $a=1$, $b=p$, $c=q$ bolsa, keltirilgen kvadrat teńleme $x^2+px+q=0$ payda boladı. Bul jaǵdaylarda teńlemeniń korenleriniń formulası: $$x_{1,2}=\frac{-p\pm\sqrt{p^2-4q}}{2} \,\, \text{yamasa} \,\, x_{1,2}=-\frac{p}{2}\pm \sqrt{\left(\frac{p}{2}\right)^2-q}$$ túrinde boladı. Bul formulanı, ásirese, $p$ jup san bolǵanda paydalanǵan qolaylı boladı.