– meyli $x\neq a$ mánisleri $a$ ǵa umtılsın, al $f(x)$ mánisleri $A$ sanına umtılsın. Sonda $A$ sanı $x$ argument (ózgeriwshi) $a$ ǵa umtılǵandaǵı $f(x)$ funkciyasınıń shegi (limiti) dep ataladı hám $$\lim_{x\rightarrow a} f(x)=A$$ kórinisinde belgilenedi. Usınıń menen birge, funkciyanıń noqattaǵı sheginiń tómendegi anıqlamasın da keltiremiz: berilgen $f(x)$ funkciyası $a$ noqattıń sol noqattıń ózi kiriwi shárt bolmaǵan bazı bir dógereginde anıqlanǵan bolıp, $A$ bazı bir haqıyqıy san bolsın. Eger qálegen $\varepsilon>0$ sanın alǵanda da sonday $\delta>0$ tabılıp, $$0<|x-a|<\delta$$ shártti qannatlandıratuǵın argumenttiń barlıq $x$ mánisleri ushın $$|f(x)-A|<\varepsilon$$ teńsizligi orınlansa, $A$ sanı $f(x)$ funkciyanıń $a$ noqattaǵı (yamasa $x\rightarrow a$ daǵı) limit mánisi (shegi) dep ataladı.