– eger $y=f\left(x\right)$ funkciyanıń anıqlanıw oblastına tiyisli bolǵan $x=a$ noqattıń $[a-\varepsilon, a+\varepsilon]$ dógeregindegi, yaǵnıy $a$ ǵa jetkilikli jaqın bolǵan barlıq $x$ ushın $f(a)>f(x)$ teńsizligi orınlansa, onda $y=f\left(x\right)$ funkciyası $x=a$ noqatta maksimumǵa (lokal maksimumǵa) iye boladı. Bul $x=a$ noqatı funkciyanıń lokal maksimum noqatı delinedi, al $f(a)$ mánisi funkciyanıń maksimum mánisi dep ataladı. Grafikalıq jaqtan funkciyanıń lokal maksimumı iymek sızıqtıń tóbesin ańlatadı, al funkciyanıń lokal maksimum noqatı usı funkciyanıń ósiwiniń onıń kemiyine ótiw shegarası boladı. Eger $(a ; b)$ aralıqta úzliksiz bolǵan $y=f\left(x\right)$ funkciyası tek bir $x_1$ lokal maksimum noqatına iye bolsa, onda $y=f\left(x_1\right)$ bul funkciyanıń usı aralıqtaǵı eń úlken mánisi boladı. Eger $y=f\left(x\right)$ funkciyası $[a ; b]$ aralıqta birneshe (shekli sandaǵı) $x_1,x_2, \ldots ,x_n$ lokal maksimum noqatlarǵa iye bolsa, onda funkciyanıń usı aralıqtaǵı eń úlken mánisi (global (absolyut) maksimum mánisi) $f(a),f(x_1), \ldots ,f(x_n), f(b)$ mánisleriniń eń úlkeni boladı. Bul jaǵdayda funkciya global maksimumǵa erisetuǵın noqat global maksimum noqatı dep ataladı.