– 1. Tegisliktegi eki noqat arasındaǵı aralıq. Meyli tegislikte eki $A(x_1, y_1)$ hám $B(x_2, y_2)$ noqatları berilsin. Bul noqatlar arasındaǵı aralıq $$|AB|=\sqrt{(x_2-x_1)^2+(y_2-y_1)^2}$$ formulası boyınsha esaplanadı. Eger $A$ noqatınıń koordinataları $(x, y)$ bolsa, yaǵnıy $A(x, y)$ bolsa, al $B$ noqatınıń koordinataları $x_2=0$, $y_2=0$ bolsa, yaǵnıy ol koordinatalar bası menen ústpe-úst tússe, onda $$|AB|=\sqrt{x^2+y^2}$$ boladı. 2. Keńisliktegi eki $A(x_1, y_1, z_1)$ hám $B(x_2, y_2, z_2)$ noqatları arasındaǵı aralıq $$|AB|=\sqrt{(x_2-x_1)^2+(y_2-y_1)^2+(z_2-z_1)^2}$$ formulası boyınsha esaplanadı. Bul formula tuwrı múyeshli parallelepipedtiń ólshemleri $$a=|x_2-x_1|,\quad b=|y_2-y_1|, \quad c=|z_2-z_1|$$ bolǵanda onıń diagonalınıń uzınlıǵın ańlatadı. Eger $B$ noqat koordinatalar basında jatsa, al $A(x, y, z)$ noqatı bolsa, onda koordinatalar basınan $A$ noqatqa shekemgi aralıq $$|AB|=\sqrt{x^2+y^2+z^2}$$ formulası menen anıqlanadı.